登录

小曼谷之旅
bblin   2017-08-2277想吃   2588浏览

九龍城食泰國菜係出曬名㗎啦!所以今次真係要介紹D出曬名嘅嘢,而唔係食過啲乜就介紹啲乜~

係九龍塘鐵路站🚞出黎坐小巴,大概要20-30mins到九龍城街市落,之後行一小段路就可以見到佢---小曼谷海鮮燒烤屋。

黎到門口,出面隻公仔係咁向我地招手,叫我地快啲埋黎啦,開飯啦~哈哈。佢真係好鬼盞鬼!

好多第一次黎嘅朋友真係唔知點樣叫餸食,我上一篇文都有個小提議,就係專門叫啲招牌咪OK囉~你話係咪好簡單?!話說門口就有份推薦餐牌,你睇佬細幾咁貼心!

夜晚黎呢度食飯嘅人好多,所以老細就企定定係電視機下面睇下客人有啲乜吩咐咁~正所謂隨傳隨到,服務周到嘛~

一坐低就有凍水飲,炎炎夏日,冷氣開得好足夠曬涼。隨手就可以拎起本menu睇下今晚食乜餸了喂~一打開,花多眼亂,要用絕招---招牌!

唔駛驚,有一張推薦menu係度,第一次黎嘅朋友真係慳返啲時間、表情、青春~不過我同男朋友黎,佢以前就住呢度附近,所以唔擔心選擇困難啦~

餐具好簡潔,印有大笨象嘅公仔係碟同杯,其實我都有去過泰國,泰國啲餐具都係好簡單,係呢度同樣可以感受到係泰國嘅風情~

「泰式生蝦刺身🌶️」$108 推介指數:🇹🇭🇹🇭🇹🇭🇹🇭🇹🇭
第一次食泰式嘅生蝦刺身,一份有6隻,每一隻都去頭+剝佐殼同埋開佐中間,淨低尾殼,客人食起身好方便,咬住蝦身,抓住尾殼一拉,就可以食到。

佢個樣似生嘅基圍蝦,每隻蝦上面都有一塊蒜片同切片辣椒,我唔食得辣,所以都會撥開蒜片同辣椒,之後沾啲自家製辣醬食~食落非常爽口,非常之鮮甜新鮮,好特別!

「泰式鮮蝦炒金邊粉」$85 推介指數:🇹🇭🇹🇭🇹🇭🇹🇭🇹🇭
我最最最最推薦呢個炒粉,係其他地方食過,不過呢度嘅粉真係最好味~料好足,有芽菜、韭菜、豆腐乾、雞蛋、鮮蝦,米粉,個樣配料炒製而成~碟嘅一邊有花生碎,仲有半個細青檸,可以撈混啲米粉一齊食~

鮮蝦新鮮彈牙,米粉好有鍋氣,米粉好韌,帶啲甜甜地酸酸地,超級好味呀,呢個真係必點!

「蒜香胡椒炸雞全翼」$78 推介指數:🇹🇭🇹🇭🇹🇭
一上台就急不可待想食,不過啱啱炸起好熱,隔住個moon都覺得啲炸粉好薄,料多,上面有啲香菜~

等佐幾分鐘先敢再擺落口~雞翼唔算太大,咬落都幾有肉,肉好嫩滑,仲見到有啲肉汁流出,不過就咁食淡佐小小~

店員畀佐啲甜酸醬我地,我試佐下,又真係好好味,酸酸甜甜,加埋雞翼本身鮮味,好易入口!

「泰皇咖喱炒羔蟹」$時價 推介指數:🇹🇭🇹🇭🇹🇭🇹🇭🇹🇭
黎呢度點少得咖喱炒蟹?!
不過講真,個蟹真係好大隻,時價~建議落單前問清楚當日價錢~
隻蟹真係好大,好霸氣咁趴係個碟度,畀啲咖喱配料圍埋~一上台好有驚喜,啲味好香,好濃郁嘅咖喱味,好想叫碗白飯!

因為隻蟹夠大,所以蟹腳夠多肉,因為經過處理,有啲地方嘅殼好容易就可以撥開~

蟹腳都好有肉,店員畀佐把鉗我地,輕輕鉗佐下就撥到,好多肉,好鮮甜好嫩滑嘅蟹肉~

最後先黎處理呢個大過我手巴掌嘅蟹蓋,裡面好多膏,撈埋啲咖喱食,真係very good啊!食完剩低一大盤咖喱,好想打包返歸下餐撈飯食~

話說黎九龍城呢間小曼谷食泰國菜真係好好推介,唔駛再咁老遠去到泰國~除佐呢間小曼谷,呢度都有好多細細間既泰國菜,不過推薦你必試呢間先!

———🇹🇭———🇹🇭———🇹🇭———🇹🇭———🇹🇭———
最後等我教你幾句泰文啦,請注意,以下譯文請用粵語讀出~

「你好!」
男說:莎嘩lee給~
女說:莎嘩lee咔~

「多謝!」
男說:確冠給~
女說:確冠咔~

靚仔=look羅 靚女=冠水 洗手間=康欖
幾多錢=偷泥 埋單=夾櫈 好好味=亞來mark mark